Verð á eldislaxi heldur áfram að hækka í Evrópu

Verð á eldislaxi heldur áfram að hækka í Evrópu og er nú komið yfir 40 norskar kr. fyrir kílóið af minnsta laxinum eða um 800 kr. Verð a stærsta laxinum er komið í 44 norskar kr.

Þetta eru verðin nú á laxamarkaðinum Fish Pool og miðast við lax til slátrunar í næstu viku að því er segir á vefsíðunni e24.no. Samkvæmt Birgitte Sörheim markaðsstjóra Fish Pool skýrast verðhækkanir þessar af minnkandi framboði og minni framleiðslu eldisstöðvanna á þessum árstíma.

Við fréttirnar í morgun um hækkandi verð á eldislaxi hækkuðu hlutabréf í Marine Harvest um 1,9% en félagið er stærsti framleiðandi á eldislaxi í heiminum.

Verð á eldislaxi hefur haldist hátt nær allt þetta ár sökum vandræða með sjúkdóma í eldisstöðvum í Chile. Landið er stærsti framleiðandi heimsins á eldislaxi en vegna sjúkdóma hefur framleiðslan dregist saman um 60%. Ekki er talið líklegt að Chile nái fyrri ársframleiðslu, 500.000 tonnum, fyrr en eftir þrjú til fjögur ár.