Marel: Stóðum rétt að málum

Marel Food Systems segir óumdeilt að stjórnarformaður fyrirtækisins hafi að öllu leyti staðið rétt að framkvæmd viðskipta tveggja fjárhagslega tengdra aðila stjórnarformanns fyrirtækisins, að fram kemur í tilkynningu.

Þann 4. desember 2008 tók stjórn Fjármálaeftirlitsins ákvörðun um að sekta Marel vegna brots á lögum um verðbréfaviðskipti . FME taldi með vísan til atvika máls að öðru leyti, þ.e. stjórnvaldssekta í sambærilegum málum, að hæfileg sekt væri ein milljón króna.

Í umfjöllun um málið á heimasíðu FME segir að Fjármálaeftirlitið komst að þeirri niðurstöðu að Marel hefði brotið gegn lögum um verðbréfaviðskipti með því að birta ekki tilkynningu innan tilskilinna tímamarka um viðskipti tveggja fjárhagslega tengdra aðila stjórnarformanns félagsins, Árna Odds Þórðarsonar.

,,Það skal tekið fram í þessu sambandi að það er óumdeilt að stjórnarformaðurinn stóð réttilega að framkvæmd viðskiptanna að öllu leyti. Það var því ekki um brot af hans hálfu að ræða heldur einfalda yfirsjón regluvarðar félagsins sem fólst í því að hann sendi tilkynningu á réttum tíma til FME en láðist að senda hana til Kauphallarinnar," segir í tilkynningu frá Marel Food Systems.

Þá er jafnframt tekið fram að fyrirtækið leit aldrei svo á að félagið hefði hafnað sáttaboði FME í málinu. ,,Taldi félagið fyrirætlun FME um viðurlög í málinu væri í engu samræmi við eðli málsins né önnur sambærileg mál. Lögmenn félagsins höfðu verið í miklum samskiptum við FME vegna málsins og taldi félagið að viðræður væru enn í gangi. Það kom félaginu því verulega á óvart þegar stjórn FME tók ákvörðun þann 4. desember 2008 um að beita félagið stjórnvaldssekt."

Marel var gefinn gefinn kostur á að koma að frekari skýringum og sjónarmiðum í málinu sem það síðast gerði í september 2008. ,,Félagið hafði þá komið á framfæri þeirri skoðun að gild rök fyrir því að athugasemd væri fullnægjandi úrræði gagnvart félaginu þar sem um minniháttar brot væri að ræða. Eins og fyrr segir var um smávægilega yfirsjón að ræða en ekki ásetning og þá var um óveruleg viðskipti að ræða, eða að upphæð kr. 2.133.081 að markaðsvirði á viðskiptadegi 15. maí 2008, sem samsvarar um 0,0039% af heildarhlutafé félagsins. „

Þrátt fyrir að ákvörðun stjórnar FME hafi komið á óvart í ljósi þessara málsatvika ákvað Marl að una niðurstöðu hennar, enda sé það einlægur ásetningur félagsins að tryggja í hvívetna fylgni við leikreglur fjármálamarkaðarins.