Fyrrum Ikea-forstjóri meðeigandi Straums í Biva

Anders Moberg fyrrum forstjóri Ikea er orðinn meðeigandi Straums að húsgagnaverslsunarkeðjunni Biva í Danmörku. Moberg mun jafnframt verða stjórnarformaður Biva.

Straumur keypti Biva s.l. vetur, en keðjan var þá í greiðslustöðvun, af fjárfestingarsjóðunum Odin Equity Partners og Dania Capital en sjóðirnir voru að hluta til í eigu Henry Johansen, stofnandi Biva og dóttir hans Mille.

Í frétt um málið á börsen.dk er haft eftir Oscar Crohn forstjóra Straums í Danmörku að Moberg og Carsten Normann forstjóri Biva hafi farið í saumana á starfsemi Biva og samhliða því verki hafi verið rætt við Moberg um að hann kæmi að rekstri Biva.

„Við erum mjög ánægðir með að maður á borð við Anders Moberg hafi nú ákveðið að koma inn sem stjórnarformaður Biva Möbler", segir Chrohn.

Moberg, sem er 59 ára gamall, starfaði sem forstjóri Ikea í 13 ár en hafði áður verið í toppstöðum hjá Royal Ahold og Home Depot. Nú notar Moberg tíma sinn til stjórnarsetu í ýmsum stórfyrirtækjum þar á meðal DFDS, Husqvarna AB oig Clas Ohlson AB.

„Ég sé mikla möguleika að styrkja rekstur Biva Möbler á komandi árum," segir Moberg í samtali við börsen. „Í fyrstu munum við sinna sem best þeim verslunum og viðskiptavinum sem við þegar höfum en síðan munum við auka við starfsemina."

Biva Möbler rekur nú 54 verlsanir í Danmörku og eru starfsmennirnir um 350 talsins.