David Sullivan í viðræðum um kaup á West Ham

David Sullivan hefur átt óformlegar viðræður við CB Holding um kaup á enska úrvalsdeildarliðinu West Ham að því er segir í frétt í blaðinu Evening Standard. Sullivan er einn af fyrrum eigendum Birmingham liðsins.

Blaðið segir að Sullivan og David Gold, meðeigandi hans að Birmingham, séu áfjáðir í að komast aftur í fótboltann eftir að þeir seldu liðið til Carson Yeung, fjármálamanns frá Hong Kong. West Ham er efst á óskalistanum hjá þeim enda studdi Sullivan liðið þegar hann var strákur.

Fram kemur í fréttinni að ekki sé víst að Sullivan lítist á verðmiðann sem settur er á West Ham, um 100 milljónir punda, né heldur skuldir félagsins sem nema um 50 milljónum punda.

„Skuldir West Ham virðast verða mjög stórar," segir Sullivan. „Ég er ekki viss um að ég geti horfst í augu við það sem er að gerast þarna en West Ham þarf hjálp og það fljótt."

David Gold mun hafa verið upplýstur um viðræður Sullivan um West Ham kaupin en í fréttinni segir að nokkrir fjárfestar hafi lýst áhuga sínum á að kaupa liðið. Blaðið segir að þeir báðir séu áhugasamir um að kaupa West Ham en að skuldastaðan valdi taugatitringi hjá þeim sem og núverandi staða liðsins í úrvalsdeildinni.

„West Ham er félag sem stendur nálægt hjarta mínu og ég myndi elska að verða tengdur því," segir Sullivan.

Blaðið getur þess að CB Holding, sem er að stærstum hluta í eigu Straums, séu áhugasamt um að selja West Ham en gæti hinsvegar viljað bíða þar til aðstæður á markaðinum batna.