Xabi Alonso frá í allt að tíu daga vegna meiðsla

Xabi Alonso, miðjumaður Real Madrid, meiddist í 5-2 sigri liðsins á FC Zurich á þriðjudaginn og nú er orðið ljóst að meiðslin hans eru það alvarlega að hann verður frá í tíu daga. Hann tognaði á vöðva á fæti.

Xabi Alonso meiddist á 59. mínútu í stöðunni 3-0 og svissneska liðið náði að skora tvö mörk á fyrstu sex mínútunum eftir að Argentínumaðurinn Fernando Gago leysti hann af hólmi. Real Madrid náði hinsvegar að skora tvö síðustu mörkin í blálokin og innsigla sigurinn.

Xabi Alonso mun missa af deildarleik á móti Xerez um helgina sem og leik á móti Villarreal á miðvikudaginn kemur.