Óvíst hvort Messi spilar í El Clasico

Enn er óvíst hvort að Lionel Messi verði í liði Barcelona sem mætir Real Madrid í stórslag helgarinnar í spænsku úrvalsdeildinni.

Messi meiddist um síðustu helgi er Barcelona gerði 1-1 jafntefli við Athletic Bilbao á útivelli og missti hann af leik Barcelona gegn Inter í Meistaradeild Evrópu í vikunni.

„Ég mun ákveða á morgun hvort að Messi spilar eða ekki," sagði Pep Guardiola, stjóri Barcelona.

„Ég myndi auðvitað vilja að hann spili á morgun en við getum vel unnið Real án hans."

Einnig er óvíst hvort að Zlatan Ibrahimovic verði með Börsungum á morgun en hann meiddist í leik Barca og Mallorca fyrir tveimur vikum síðan.

Yaya Toure er þó líklega klár í slaginn eftir að hann jafnaði sig á svínaflensu en Gabriel Milito á þó enn langt í land með sín meiðsli.