Niðursveiflan í Litháen hefur náð hámarki

Niðursveiflan í Litháen, sem er sú dýpsta innan Evrópusambandslandanna, er líklega að ná hámarki og má búast við því að hagvöxtur verði á næsta ári, haldi eftirspurn áfram að aukast.

Þetta er mat seðlabankastjóra Litháen, Reinoldijus Sarkinas. Hann telur að ef jákvæðar aðstæður erlendis haldast megi búast við hagvexti, jafnvel þótt lítill verði.

Fjallað er um málið í Hagsjá, vefriti hagfræðideildar Landsbankans. Þar segir að forsætisráðuneyti landsins býst þó við samdrætti í þjóðarframleiðslu upp á 4,3% á næsta ári en til að uppfylla skilmála um upptöku evrunnar þarf að draga ríflega saman í ríkisútgjöldum.

Aukin skattheimta og lægri ríkisútgjöld voru stór þáttur í 20,2% samdrætti hagkerfisins á síðasta ársfjórðungi og ákvað ríkisstjórnin í gær að herða sultarólina enn frekar til að koma í veg fyrir að fjárlagahallinn fari yfir 8% af þjóðarframleiðslu þessa árs. Aukinn fjárlagahalli leiðir þó ekki til þess að landið þurfi hjálp við fjármögnun og hefur landið að sögn forsætisráðherrans enga þörf fyrir utanaðkomandi hjálp. Þetta kemur fram í frétt Bloomberg fréttaveitunnar.

Litháen ætti að komast hjá því að þurfa að þiggja utanaðkomandi aðstoð ef það nær að safna fé á innlendum eða erlendum skuldabréfamörkuðum. Að mati Sarkinas hafa aðstæður á erlendum fjármagnsmörkuðum batnað umtalsvert síðan í upphafi árs og segir að líklega sé hægt að gefa út skuldabréf í evrum á hagstæðari kjörum en gert var í upphafi ársins.