Efnahagsbati í Simbabve

Hagkerfi Simbabve hefur snúið aftur úr táradal síðustu ára. Dregið hefur hratt úr atvinnuleysi, sem mældist 94 prósent í febrúar, og framleiðni hefur tvöfaldast. Þá hafa stjórnvöld náð taki á verðbólgudraugnum og er stefnt að því að snúa hann niður. Þetta segir Elton Mangoma, viðskiptaráðherra Simbabve.

Efnahagsbatinn hvílir á dollaravæðingu hagkerfisins en vonast er til að í kjölfarið muni erlendir fjárfestar streyma til landsins.

Mangoma segir nýja ríkisstjórn landsins sem tók við í febrúar hafa lyft grettistaki. Atvinnuþátttaka sé nú fimmtán prósent og megi reikna með að allt að þrjátíu prósenta markinu verði náð innan skamms.

Efnahagslíf Simbabve hefur verið í molum um árabil og verðbólga staðið í 200 milljón prósentum. Reiknað er með allt að fimm prósenta hagvexti á þessu ári, að sögn Mangoma.