Skuldastaða breska ríkisins mjög slæm

Það eru fleiri ríki en Ísland sem búa við slæma skuldastöðu. Samkvæmt bresku hagstofunni tóku bresk stjórnvöld 8 milljarða punda að láni í síðasta mánuði. Aldrei áður hefur breska ríkið þurft á svo háu lánsfjármagni að halda í júlí mánuði.

Í júlí nam fjárlagahalli breska ríkisins 5,1 milljarði punda samanborið við tekjuafgang upp á 7,8 milljarða punda í júlí 2008.

Heildarskuldir Breska ríkissjóðsins nemur nú 800,8 milljörðum punda eða 56,8% af landsframleiðslu Bretlands. Þetta hlutfall skulda af landsframleiðslu er það mesta síðan mælingar hófust árið 1974.

Breska ríkið hefur eytt rúmlega 140 milljörðum punda við að bjarga bönkum frá gjaldþroti en þó að þau lán séu undanskilin nema lántökur breska ríkisins 658,1 milljarði punda eða 46,6% af landsframleiðslu.

Allir helstu fjölmiðlar Bretlands hafa fjallað um málið í dag.

Þar segir ennfremur að vanalega sé júlí góður mánuður fyrir ríkissjóð þar sem skattgreiðslur eru oft á tíðum háar í þeim mánuði.

Því koma tíðindin Bretum í opna skjöldu en breskir neytendur létu til sín taka á breskum verslunarmarkaði í júlí, í ljósi jákvæðra tíðinda af bresku efnahagslífi að undanförnu. Sala á smásölumarkaði í Bretlandi jókst í kjölfarið um 0,4% frá júní mánuði.