Dallas og Jets áfram

Úrslitakeppnin í NFL-deildinni hófst í nótt og komust Dallas Cowboys og New York Jets áfram í næstu umferð.

Dallas vann sigur á Philadelphia Eagles, 34-14, þar sem leikstjórnandinn Tony Romo fór mikinn í öðrum leikhluta. Þetta var fyrsti sigur Dallas í úrslitakeppninni síðan 1996.

Dallas mætir nú Minnesota í annarri umferð þar sem að Romo mætir æskuhetju sinni, Brett Favre hjá síðarnefnda liðinu.

Þá vann Jets sigur á Cincinnati Bengals, 24-14.

Í kvöld fara fram hinar tvær viðureignirnar í fyrstu umferðinni. Green Bay mætir Arizona annars vegar og hins vegar lið Baltimore og New England.