Rætt um að evruríkin stofni sérstakan gjaldeyrissjóð

Evruríkin ættu að velta því vandlega fyrir sér hvort þörf sé á því evrópskri stofnun, sambærilegri við Alþjóðagjaldeyrissjóðinn, til þess að forðast nýtt áfall líkt og hrun Grikklands. Þetta segir Wolfgang Schaeuble, fjármálaráðherra Þýskalands, í samtali við þýska blaðið Welt.

Framkvæmdastjóri Alþjóðagjaldeyrissjóðsins segir að það sé fullkomlega eðlilegt að Evrópuríkin reyni að byggja upp allar þær stofnanir sem þeir telji sig þurfa.

Fjárhagsvandræðin sem Grikkir hafa staðið frammi fyrir á þessu ári eru mesta próf sem evruríkin hafa staðið frammi fyrir frá því að Myntbandalag Evrópu var stofnað. Evran hefur lækkað um næstum 5 prósent gagnvart bandaríkjadal á þessu ári vegna ótta við að mögulegt greiðsluþrot Grikkja gæti gert út um myntsamstarfið.

Forsætisráðherra Grikkja, George Papandreou, hefur kynnt umfangsmiklar niðurskurðaraðgerðir til þess að fást við fjárhagsvandann. Angela Merkel, kanslari Þýskalands, hefur hingað til verið ófús til að tjá sig um hverskonar aðstoð evruríkin myndu bjóða Grikkjum ef þörf væri á. Enda er talið að slíkar björgunaraðgerðir myndu mælast mjög illa fyrir á meðal almennings í Þýskalandi.

Daily Telegraph greindi frá.