Árangur Rosberg kemur ekki á óvart

Nobert Haug hjá Mercedes segir að það komi sér ekkert á óvart að Nico Rosberg sé að standa sig vel sem liðsfélagi Michael Schumacher. Rosberg varð í þriðja sæti á eftir Red Bull mönnum í gær. "Þegar sögusagnir af Michael komu upp, þá hringdi Nico í mig og spurði hvort það væri satt. Hann vildi ólmur fá hann til liðsins", sagði Haug um Rosberg. Það segir meira en mörg orð um styrk Rosberg að hann vildi vinna með og keppa við meistarann margfalda. Haug vann áður náið með McLaren sem notar Mercedes vélar, en síðan ákvað Mercedes að kaupa Brawn liðið og Haug vinnur náið með Ross Brawn. Haug segir þá vinna saman og engin sé í forstjóraleik, þó tvö fyrirtæki hafi samneinast sem ein heild. Brawn er framkvæmdarstjóri liðsins. "Ég vil vinna með þeim bestu, eins og Ross Brawn. Við erum ekki upp á móti hvor öðrum, heldur vinnum saman. Ég vil hafa þann besta mér við hlið, þannig að ég vinni enn betur en ella. Það sama á við um Rosberg." Rosberg var hluti af ungliðahópi Mercedes í kart kappakstri ásamt Lewis Hamilton. "Ég hef þekkt Rosberg lengi og þegar ég vann með McLaren þá reyndum við að fá hann þangað. Þá þekki ég Keke pabba hans vel og Rosberg hefur alltaf vakið athygli. Það kemur mér ekkert á óvart að hann er að skila sínu. Hann er að negla þetta."