Mourinho dreymir um að vinna með Rooney

Jose Mourinho er byrjaður að hrista upp í stjórnum félaga um Evrópu, til að mynda hjá Liverpool og Chelsea eftir að hafa sagst hafa áhuga á Frank Lampard og Steven Gerrard. Hann gerir þó ekkert slíkt hjá Manchester United.

Mourinho settist niður með Guillem Balague blaðamanni sem spurði hann ýmissa spurninga fyrir spænska blaðið AS.

Hann greindi svo frá því á heimasíðu sinni í dag að hann hefði spurt Mourinho að því hvern hann dreymdi um að þjálfa. Og það stóð ekki á svarinu.

"Wayne Rooney. En ég segi það af því það er ómögulegt. Vinur minn Alex Ferguson getur slappað af, af því það er ómögulegt," sagði Mourinho sem margir veðja reyndar á að taki við af Sir Alex þegar hann hættir hjá United.