Vinsældir Afríku aukast

Afríka er farin að þykja mjög álitlegur staður fyrir ferðamenn. Ástæðan er annars vegar sú athygli sem álfan hefur fengið vegna afrísks uppruna Baracks Obama, forseta Bandaríkjanna, og hins vegar að Heimsbikarinn verður haldinn þar í ar.

„Það hefur orðið algjör breyting á því hvernig fólk lítur á Afríku," segir Taleb Rifai, yfirmaður Ferðaþjónustustofnunar Sameinuðu þjóðanna.

Afríka var eina álfan í heiminum þar sem heimsferðamennska jókst í fyrra, en þá jókst hún um 5%. Ferðamennska dróst hins vegar saman um 4% þegar tölur yfir allan heiminn eru skoðaðar. Efnahagssamdrættinum og svínaflensunni er kennt um það.

Í samtali við BBC fréttastofuna benti Rifai hins vegar á að hlutur Afríku á ferðamannamarkaði væri einungis 5 % eða um 50 milljónir af 900 milljónum.