Breska pundið fellur

Breska pundið hefur náð nýjum lægðum gagnvart Bandaríkjadal og evru, bæði vegna fjármálaóróa og pólitískrar óvissu.

Samkvæmt skoðanakönnunum eru litlar líkur á að takist að mynda meirihlutastjórn í Bretlandi að loknum kosningum í vor. Það eykur ekki tiltrú fólks á framtíð efnahagslífsins eða gjaldmiðils landsins.

Vogunarsjóðir og stórir fjárfestar reikna með frekara falli pundsins og almennir fjárfestar eru margir hverjir að forða sér í öruggara skjól, með ekki mjög hagstæðum afleiðingum fyrir pundið.

Breska ríkið, rétt eins og evruríki á borð við Spán og Grikkland, hefur tekið háar fjárhæðir að láni, sem veldur því að fjármálafólk hefur áhyggjur af því að ríkið geti staðið undir því að greiða allt þetta lánsfé til baka. Þar með skapast þessi þrýstingur á pundið, og ekki bæta áhyggjur af stjórnmálahorfunum úr.

Pundið hefur fallið um 8 prósent gagnvart dollar og 2 prósent gagnvart evru það sem af er árinu. Gagnvart dollaranum hefur pundið ekki staðið verr í tíu mánuði.

Gagnvart krónunni hefur pundið fallið um tæp fimm prósent frá ársbyrjun, eða úr 202 krónum niður í 193, en komst reyndar upp í 207 krónur seint í janúar

.- gb