Messi og Villa skoruðu báðir tvö mörk í stórsigri á Sevilla

Lionel Messi og David Villa skoruðu báðir tvö mörk fyrir Barcelona í kvöld sem vann 5-0 storsigur á Sevilla í spænsku úrvalsdeildinni í fótbolta. Messi kom Barcelona í 1-0 eftir aðeins fjórar mínútur og það var aldrei vafi um sigur Börsunga ekki síst eftir að þeir urðu manni fleiri í lok fyrri hálfleiks.

Lionel Messi skoraði fyrsta markið og lagði síðan upp annað markið fyrir David Villa á 24.mínútu. Abdoulay Konko fékk síðan tvö gul spjöld með þriggja mínútu millibili undir lok hálfleiksins og varð því að yfirgefa völlinn með rautt spjald.

Eftirleikurinn var því auðveldur fyrir Börsunga. Dani Alves kom Barcelona í 3-0 á 53. mínútu og Messi skoraði síðan annað mark sitt ellefu mínútum síðar. David Villa innsiglaði síðan sigurinn í blálokin með sínu öðru marki í leiknum.

Barcelona er einu stigi á eftir Real Madrid sem vann 3-1 sigur á Hercules fyrr í kvöld.