Bandaríkjamennirnir Mayweather og Mosley mætast

Nú er búið að staðfesta að næsti bardagi hins ósigraða Floyd Mayweather verður gegn Shane Mosley 1. maí í Las Vegas.

Það er því ljóst að í bili að minnsta kosti verður ekkert af óskaeinvígi flestra hnefaleikaaðdáanda á milli Mayweather og Manny Pacquiao en viðræður áttu sér þó stað á milli þeirra.

Mosley átti að mæta Andre Berto í titilbardaga um WBC-veltivigtarbeltið en eftir að sá bardagi frestaðist stökk Mayweather á tækifærið að mæta landa sínum Mosley.

„Ég hef alltaf sagt það að ég vill bara mæta þeim bestu og að mínu mati er Shane einn af þeim. Hann er samt ekki nógu góður til þess að vinna mig," sagði Mayweather þegar tilkynnt var um bardagann.