Button segir McLaren taka framförum

Jenson Button segir að liðinu hafi tekist að bæta McLaren bílinn fyrir næsta mót sem er í Kína um helgina. Hann flaug frá Malasíu í síðustu viku til Englands til að vinna að þróun bílsins í ökuhermi með tæknimönnum sínum. Button segist vonast eftir þurru veðri á Sjanghæ brautinni í Kína um helgina, en hann varð í þriðja sæti í mótinu á síðasta ári á eftir Sebastian Vettel og Mark Webber hjá Red Bull. "Ég nýt þess að keyra brautina, sem er dæmigerð nútímabraut og með blöndu af köflum sem krefjast nákvæmni og tæknilegrar útsjónarsemi, bæði hröðum beygjum og löngum beinum köflum. Þetta er ökumannsbraut og hentar vel uppsettum keppnisbíl. Ég held að við höfum náð framförum hvað það atriði varðar", sagði Button sem lagði á sig 13.000 mílna ferðalag til og frá Asíu til að vinna í ökuherminum með McLaren. "Ég varði degi í tæknisetri McLaren til að sjá hvað við gætum gert betur með tillliti til mótsins í Sjanghæ. Ég tel að ég hafi öðlast betri skilning á keppnisbílnum og við vitum núna hvernig á að fínstilla bílinn hvað jafnvægið varðar. Líka hvernig á að stilla honum upp um helgina. Í heildina erum við að taka framförum, sem er alltaf jákvætt", sagði Button.