AGS setur hluta af gullbirgðum sínum á almennan markað

Alþjóðagjaldeyrissjóðurinn (AGS) hefur ákveðið að setja hluta af gullbirgðum sínum á almennan markað. Um er að ræða 191,3 tonn af gulli sem verða seld en ætlunin er að þetta magn fari í smáskömmtum á markaðinn til að trufla ekki verðmyndunina á gulli.

Eins og fram kom í fréttum fyrir áramótin ákvað AGS að setja 400 tonn af gulli í sölu en þetta magn er einn áttundi hluti af gullbirgðum sjóðsins.

Indverski seðlabankinn (RBI) var snöggur til og festi kaup á 200 tonnum af gulli frá AGS í nóvember s.l. Var það fyrsta sala sinnar tegundar af gullbirgðum AGS í níu ár. Alls borguðu Indverjar 4 milljarða punda eða rúmlega 800 milljarða kr. fyrir gullið.

Markmiðið með gullsölunni er að bæta lausafjárstöðuna hjá AGS en sjóðurinn er að störfum í mörgum löndum vegna fjármálakreppunnar.

Í frétt um málið á vefsíðu sjóðsins er haft eftir Andrew Tweedie fjármálastjóra AGS að forgangsatriði sé að tryggja að salan á gullinu trufli ekki markaðinn.