Guðný með flottustu tilþrifin í kynningarmyndbandi Kristianstad

Kristianstad hefur byrjað vel í sænsku kvennadeildinni og ekkert lið hefur skorað fleiri mörk í fyrstu þremur umferðunum en leikmennirnir hennar Elísabetar Gunnarsdóttir. Þrír íslenskir leikmenn eru fastamann í liðinu en Elísabet er á sínu öðru ári sem þjálfari Kristianstad.

Kristianstad vann 3-1 sigur á AIK í gær þar sem fyrirliðinn Susanne Moberg skoraði þrennu en hún er markahæsti leikmaður deildarinnar með sex mörk í þremur fyrstu leikjunum.

Stelpurnar í Kristianstad-liðinu útbjuggu líka saman skemmtilegt myndband fyrir AIK-leikinn þar sem þeir léku sér í fótbolta út um allan bæinn. Í þessu myndbandi fór Íslendingurinn Guðný Björk Óðinsdóttir á kostum. Myndbandið var notað sem auglýsing fyrir AIK-leikinn og hafði greinilega góð áhrif á liðið.

Guðný sýndi skemmtilegar kúnstir með boltann í myndbandinu sem finna má finna með því að smella hér en í myndbandinu má einnig sjá þær Margréti Láru Viðarsdóttur og Erlu Steinu Arnardóttur.