Fari Mourinho til Real Madrid fær Rafa Benítez símtal frá Inter

Innanhússlagur hjá Real Madrid ræður því hvort Jose Mourinho taki við knattspyrnuliði félagsins eða ekki. Samningur hans er tilbúinn og hann vill taka við, en óvíst er hvort af því verði.

Forsetinn Florentino Perez vill losna við Manuel Pellegrini sem stjóra, jafnvel þó að hann steli La Liga titlinum af Barcelona. Ástæðan eru tvö töp gegn erkifjendunum á tímabilinu og slakur árangur í Meistaradeildinni.

Pellegrini greindi einnig frá því að það hafi ekki verið sín ákvörðun að selja þá Arjen Robben og Wesley Sneijder, sem fór í skapið á Perez sem tók ákvörðunina.

Sá sem vill halda Pellegrini er Jorge Valdano framkvæmdastjóri. Pellegrini hefur unnið 31 af 37 deildarleikjum og stuðningsmenn félagsins vilja fara að sjá stöðugleika hjá félaginu.

Þá eru þeir einnig hræddir um að stíll Mourinho, sem er frekar varnarsinnaður, henti ekki Real Madrid.

En ef Mourinho tekur við Real má Rafael Benítez búast við að fá símtal frá Inter Milan. Þetta segir Guillem Balague blaðamaður, sem er einkar vel víraður inn í bæði Real Madrid og Liverpool.

Framtíð Benítez hjá Liverpool er enn ekki skýr en áhugi Juventus á honum virðist vera að dvína. Ástæðan er hversu langan tíma málin taka hjá Benítez, sem ætti þó ekki í neinum vandræðum með að finna sér vinnu fari hann frá Liverpool.