Viðskipti erlent

Actavis og EQT með í lokatilboðum í Ratiopharm

Actavis og sænski fjárfestingarsjóðurinn EQT eru meðal þriggja aðila sem fá að gera lokatilboð í þýska samheitalyfjafyrirtækið Ratiopharm. Hinir tveir tilboðsgjafarnir verða bandaríski lyfjarisinn Pfizer og Teva frá Ísrael sem er stærsti samheitalyfjaframleiðandi heimsins.

Þetta kemur fram í frétt á Reuters þar sem segir að ekki sé útilokað að fjórði aðilinn bætist í hópinn en tilboðin á að leggja fram í uphafi næsta mánaðar.

Í fréttinni kemur fram að bæði Pfizer og Teva hafi dýpri vasa en Actavis/EQT og muni þar að auki hagnast meira á kaupunum á Ratiopharm vegna samlegðaráhrifa. Þýska blaðið Handelsblatt segir að í raun standi baráttan um Ratiopharm á milli Pfizer og Teva.

EQT er í eigu Wallenberg-fjölskyldunnar en samkvæmt heimildum Reuters mun Actavis og EQT ekki hafa burði til að bjóða meir en 3 milljarða evra í Ratiopharm. Er það einkum vegna þess hve skuldsett Actavis er fyrir.

Fram kemur í fréttinni að Deutsche Bank hafi lagt blessun sína yfir tilboð Actavis/EQT. Eins og fram hefur komið í fréttum eru allar líkur á að Deutsche Bank sé að yfirtaka rekstur Actavis enda skuldar félagið bankanum hátt í 5 milljarða evra.







Mest lesið


Fleiri fréttir

Sjá meira


×

Mest lesið