Reikna með 100% endurheimtum af umfram Icesavegreiðslum

Breska fjármálaráðuneytið reiknar með að endurheimta 100% af þeim fjármunum sem bresk stjórnvöld greiddu eigendum Icesave reikninga umfram trygginguna sem sett var á reikningana. Upphæðin sem hér um ræðir nemur um 500 milljón pundum eða rétt rúmlega 100 milljarða kr.

Þetta kemur fram á vefsíðunni citywire. Sem kunnugt er hafa bresk stjórnvöld krafist þess að Íslendingar borgi 2,3 milljarða punda vegna Icesave reikninganna í heild en þeir voru tæplega 290.000 talsins.

Fjármálráðuneytið gerir einnig kröfu um 1,1 milljarð punda til að bæta upp muninn á bresku tryggingarupphæðinni sem nam 50.000 pundum á móti þeirri evrópsku sem gerði ráð fyrir rúmlega 20.000 evrum á hvern reikning.

Á vefsíðunni segir síðan að bresk stjórnvöld geri umdeilda kröfu um að Íslendingar greiði 500 milljónir punda í viðbót til að dekka kostnað breska innistæðutryggingarsjóðsins (FSCS) við að greiða alla Icesavereikningana í Bretlandi upp í topp eða 100%. Ákvörðun um slíkt var tekin af breska fjármálaráðuneytinu í október 2008.

Fjármálráðuneytið segir að þessar 500 milljónir punda muni koma frá sölu á eignum Landsbankans í Bretlandi. „Þessar 500 milljónir til að bæta skaða FSCS munu koma úr uppgjöri Landsbankans," segir talsmaður fjármálaráðuneytisins í samtali við citywire.

Fram hefur komið hjá FSCS að sjóðurinn hefur þegar borgað út 4,3 milljarða punda vegna Icesave reikninganna og væntir þess að þurfa að borga um 170 milljónir punda í viðbót.