Favre sagður hafa sent dónalegar myndir

Það gengur mikið á hjá hinum 41 árs gamla leikstjórnanda Minnesota Vikings, Brett Favre, þessa dagana. Hann sló enn eitt metið í nótt en gat ekki notið þess þar sem hann er í vandræðum utan vallar.

Favre náði þeim árangri að kasta fyrir alls 500 snertimörkum á ferlinum í tapleik gegn Jets. Favre var næstum búinn að snúa leiknum sér í hag en kastaði frá sér boltanum í lokin og Jets kláraði leikinn.

Mikið fjölmiðlafár var í kringum Favre fyrir leikinn enda hefur NFL-deildin hafið rannsókn á hegðun hans árið 2008 er hann lék með Jets.

Þá er hann sagður hafa sent kvenkynsstarfsmanni Jets dónaleg sms og dónalegar myndir.

Favre hefur ekkert tjáð sig um málið opinberlega en hefur vakið mikla athygli enda hefur stórstjarnan aldrei lent í slíkum hneykslum á löngum ferli.