Kröfuhafarnir finna ekki Halabi

Kröfuhafar leita nú dyrum og dyngjum að sýrlenska fasteignamógúlnum Simon Halabi en hann varð gjaldþrota í vikunni. Halabi hafði byggt upp gríðarstórt fasteignaveldi í London á síðustu árum en hann mætti ekki fyrir dómara þegar hann var úrskurðaður gjaldþrota. Gjaldþrotið er vegna láns sem Halabi tók hjá Kaupthing Singer & Friedlander að uppjæð 56,3 milljónir punda. Lánið tók Halabi til þess að kaupa líkamsræktarstöðvakeðjuna Esporta árið 2007.

Breska blaðið Times segir frá málinu í dag en Laura John, lögfræðingur Ernst & Young sem fer með slitastjórn yfir Kauphing S&F, segir að Halabi hafi ekki brugðist við gjaldþrotakröfunni og að menn væru „ekki vissir um" hvar Halabi sé niðurkominn.

Lítið sem ekkert hefur sést til Halabis frá því á síðasta ári þegar verulega fór að halla undan fæti hjá honum, en hann hefur svosem úr nægu að velja þegar kemur að samastað. Hann á villu við Park Lane í London og er nágranni Róberts Tchenguiz, sem er sagður hafa kynnt hann fyrir fasteignabransanum í London. Sá hefur eins og menn vita einnig tengsl við Kaupþing.

Fyrir utan villuna við Park Lane á Halabi óðal í Buckinghamshire, kastala í Suður Frakklandi og eina snekkju. Auk þessara híbýla á Halabi fjölmargar þekktar byggingar í London á borð við Aviva turninn og skrifstofur JP Morgan Chase. Byggingarnar eru metnar á um milljarð punda í dag og því telja menn ólíklegt að Halabi sé í raun og veru gjaldþrota, þó hann svari ekki lögmönnum slitastjórnar KSF.