Kínverjar ætla að fara varlega í frekari gullkaup

Þetta kemur fram í máli Yi Gang formanns Gjaldeyrisviðskiptanefndar landsins í samtali við Reuters. Gang segir að þótt gull sé „ekki slæm eign" mun málmurinn aldrei verða stór hluti af fjárfestingum Kínverja í framtíðinni.

„Alþjóðamarkaður með gull er mjög takmarkaður. Ef ég kaupi gull í miklum mæli mun slíkt örugglega þrýsta verðinu á því upp á heimsvísu," sagði Gang á blaðamannafundi sem haldinn var á kínverska þinginu.

Verð á gulli féll um 3 dollara á únsuna um leið og Gang hafði látið þessi orð falla en náði síðan jafnvægi að nýju í 1.122 dollurum á únsuna þar sem margir markaðsaðilar höfðu reiknað með að Kína færi ekki í umfangsmikil gullkaup.

Margir fjárfestar hafa velt því fyrir sér hvort Kínverjar muni kaupa eitthvað af þeim 191,3 tonnum af gulli sem Alþjóðagjaldeyrissjóðurinn ætlar að setja á almennan markað í kjölfar þess að Indverjar keyptu 200 tonn af sjóðnum nýlega.

Sérfræðingar búast ekki við því að Kínverjar kaupi hluta af þessum 191,3 tonnum heldur haldi áfram að byggja upp gullforða sinn með rólegum kaupum á almenna markaðinum.

Kínverjar hafa keypt mikið magn af gulli undanfarin ár. Þannig upplýstu þeir á síðasta ári að þeir hefðu aukið gullforða sinn úr 600 tonnum árið 2003 og up í 1.054 tonn í fyrra.