Fjarkinn bíður eftir Fabregas hjá Barcelona

Barcelona-treyjan númer fjögur verður ekki í notkun á þessu tímabili samkvæmt frétt í Daily Mail í dag. Það lítur því út fyrir það að fjarkinn bíði því eftir Cesc Fabregas ef hann verður keyptur til Barcelona næsta sumar.

Mexíkaninn Rafael Márquez hefur undanfarin ár spilað í treyju númer fjögur hjá Barcelona en hann fór til New York Red Bulls í sumar þar sem hann að sjálfsögðu spilar áfram í fjarkanum.

Leikmenn Barcelona voru duglegir við að orða landsliðsfélaga sinn við Barcelona í haust og það verður fátt sem kemur í veg fyrir að málið komi upp um leið og félagsskiptaglugginn opnar á ný.

Fabregas hefur líka lýst yfir vilja sínum að spila með Barcelona og félagið hefur mikinn áhuga á því að fá hann til sín.