Aðgerð eða skórnir á hilluna

Enn eina ferðina veit Brett Favre ekkert hvað hann á að gera í framtíðinni. Þessi fertugi leikstjórnandi Minnesota Vikings liggur enn undir feldi en ætlar þó að skríða undan honum fljótlega.

Favre tjáði blaðamanni ESPN að hann væri að velta því fyrir sér hvort hann ætti að fara í aðgerð á ökkla eða hreinlega hætta. Hann þarf á aðgerðinni að halda ef hann ætlar sér að spila næsta vetur.

Minnesota er til í að halda Favre áfram hjá félaginu enda stóð hann sig mjög vel síðasta vetur og var ekki fjarri því að koma liðinu alla leið í sjálfan Super Bowl-leikinn.