BIS: Þjóðarskuldir eru komnar á suðupunktinn

„Eftirmáli fjármálakreppunnar er um það bil að koma bullandi fjárhagsvandamáli í hagkerfum iðnaðarþjóðanna á suðupunktinn," segir í áliti BIS en fjallað er um málið í blaðinu Telegraph. „Gífurlegs niðurskurðar er þörf til að koma í veg fyrir vaxtahækkanir, ef það er ekki þegar of seint fyrir sumar þjóðir."

Áhættan sem BIS sér fyrir augum sínum er fólgin í miklum hækkunum á vöxtum og álagi á ríkisskuldabréfum þar sem fjárfestar eru nú þegar að drukkna í þessum pappírum. „Skuldabréfamiðlarar eru þekktir fyrir skammsýni sína og telja að þeir geti komist í skjól áður en stormurinn skellur á," segir Stephen Cecchetti aðalhagfræðingur BIS í áliti sem ber heitið „Framtíð opinberra skulda".

Cecchetti segir að það sé ekki spurning um hvort heldur hvenær markaðurinn fer að þrýsta á ríkisstjórnir um að fá meira í sinn hlut fyrir að halda á sífellt stækkandi þjóðarskuldum þ.e. ríkisskuldabréfum. Cecchetti segir að hættan sé á að óstöðvandi spírall fari í gang þar sem hækkandi vextir kalli á aukna útgáfu skuldabréfa sem kalli á enn hærri vexti o.sv.fr.

Bretland fær það óþvegið í áliti Cecchetti. Landið gæti hafa siglt inn í kreppuna með litlar opinberar skuldir en það svigrúm hefur verið notað og sú þróun hefur leitt í ljós hve opinber reikningsskil eru rotin í Bretlandi. Fram kemur að stór hætta sé á að opinbera skuldir Bretlands verði stjórnlausar.

Áætlað er að bara vaxtagreiðslur af opinberum skuldum Bretlands muni vaxa úr núverandi 5% af landsframleiðslu landsins upp í 10% innan tíu ára og að árið 2040 verði þessar afborganir orðnar 27% af landsframleiðslunni. Grikkir eiga betri framtíð fyrir sér hvað þetta varðar og Ítalir eru hreinir englar í samanburðinum.

Niðurskurður hjá hinu opinbera er besta og einfaldasta leiðin til að berjast gegn of mikilli skuldsetningu. BIS segir að áætlanir núverandi stjórnar Bretlands um að draga úr umsvifum hins opinbera um 1,3% af landsframleiðslu á ári næstu þrjú árin dugi hvergi nærri til. Nær væri að taka Spán til fyrirmyndar sem ætlar að skera fjárlagahalla sinn úr 11,4% og niður í 3% á sama tímabili.