Klámmyndasýningar þurfa að bera fullan vsk í Belgíu

Samkvæmt frétt um málið á BBC rak eigandinn kynlífssjoppuna The Erotic Cinema þar sem gestum var boðið að horfa á klámmyndir í einkabásum. Eigandinn vildi síðan að sýningarnar féllu undir menningarstarfsemi og ættu því aðeins að bera 6% vsk eins og aðrar kvikmyndir í almennum bíóhúsum. Almennur vsk er hinsvegar 21% í Belgíu.

Evrópudómstóllinn komst að þeirri niðurstöðu að það sem væri í boði í The Erotic Cinema gæti ekki fallið undir menningarstarfsemi á sama hátt og almennar kvikmyndir. Dómstóllinn segir að til að hægt væri að flokka klámmyndasýningar The Erotic Cinema sem menningu þurftu þær að vera öllum opnar en ekki eitthvað sem væri horft á í einkabásum.

Málið nær aftur til ársins 2004 þegar eigandinn gerði kröfu um að borga aðeins 6% vsk af klámmyndasýningum sínum. Síðan fór málið í gegnum öll dómstigin í Belgíu og Evrópudómstólinn næstu sex árin.