Jafntefli hjá Árna Gauti (Odd Grenland) og Stefáni Loga (Lilleström)

Lilleström og Odd Grenland gerðu 2-2 jafntefli í norsku úrvalsdeildinni í fótbolta í kvöld. Björn Bergmann Sigurðarson fékk tækifæri til að skora sigurmark Lilleström í uppbótartíma en hitti ekki markið úr góðu færi.

Markverðir liðanna eru báðir íslenskir, landsliðsmarkvörðurinn Árni Gautur Arason stendur í marki Odd Grenland en í marki Lilleström er Stefán Logi Magnússon.

Björn Bergmann Sigurðarson spilaði einnig allan leikinn í framlínu Lilleström en tókst ekki að skora þrátt fyrir að hafa verið ógnandi í leiknum.

Khaled Mouelhi skoraði jöfnunarmark Lilleström úr endurtekinni vítaspyrnu eftir að Árni Gautur hafði varið fyrra vítið en dómarinn taldi hann hafa hreyft sig of snemma.

Lilleström er í 4. sæti deildarinnar, átta stigum á eftir toppliði Tromsö og fimm sætum og fjórum stigum á undan Odd Grenland.