Sigurður Ragnar: Sýnum bandaríska liðinu enga virðingu

„Mér líður ótrúlega vel. Þetta er alveg frábær tilfinning," sagði sigurreifur landsliðsþjálfari kvenna, Sigurður Ragnar Eyjólfsson, við Vísi skömmu eftir að liðið hafði tryggt sér sæti í úrslitaleik hins sterka Algarve-móts.

Íslensku stelpurnar lögðu Dani í dag, 0-1, en jafntefli hefði dugað til þess að fleyta liðinu í úrslit.

„Þetta var baráttuleikur. Við spiluðum vel. Danir voru meira með boltann en við vörðumst vel og gáfum fá færi á okkur. Ég var ósáttur við vítið sem þær fengu en Þóra varði sem betur fer. Þessi leikur þróaðist í raun svipað og hinir leikirnir í mótinu og endaði með sigri," sagði Sigurður en þetta var fyrsti sigur íslenska liðsins á Dönum.

Fram undan er leikur gegn hinu frábæra bandaríska liði og Sigurður segir að stelpurnar muni mæta grimmar til leiks.

„Ætlum að ljúka mótinu með sóma. Ný reynsla að komast í úrslitaleik en við mætum ákveðnar og ætlum að selja okkur dýrt. Stelpurnar hafa mikið sjálfstraust og það minnkaði ekki með þessum leik í dag. Við munum ekki sýna þeim neina virðingu."

Nánar verður rætt við Sigurð Eyjólf í Fréttablaðinu á morgun.