Vinnsla á stærsta kolasvæði heims að hefjast

Yfirvöld í Mongólíu hafa ákveðið að bjóða þremur námufélögum að vinna kol á því sem talið er stærsta kolasvæði heimsins. Félögin sem hér um ræðir eru Shenhua í Kína, Peabody Energy í Bandaríkjunum og samsteypa rússneskra og mongólskra félaga.

Svæðið sem hér um ræðir heitir Tavan Tolgoi og liggur í Gobi eyðimörkinni. Talið er að bara á vestur hluta þess sé hægt að vinna einn milljarð tonna af kolum. Um 68% þess magns er koks sem nýtt er í stálvinnslu en 32% henta sem eldsneyti í orkuverum.

Nú þegar flytja Mongólar út um 25 milljónir tonna af kolum á ári, að mestu til Kína en einnig nokkuð til Rússlands. Mongólía er auðugt af málmgrýti og kolum og ætla stjórnvöld þarlendis að nýta þessi náttúruauðæfi til að gera landið að námurisa á alþjóðavettvangi.

Í fyrstu hafði stjórn Mongólíu ákveðið að selja 49% af kolavinnslunni á Tavan Tolgoi til erlendra fjárfesta en hætt var við þau áform. Ákveðið var í staðinn að kolavinnslusvæðið verður í 100% eigu mongólsku þjóðarinnar en námuréttindin þar verða leigð út.