Reikna með áframhaldandi óróa á mörkuðum

Fjárfestar á Wall Street búa sig undir að í þessari viku muni óróinn á hlutabréfamörkuðum halda áfram eins og verið hefur undanfarnar tvær vikur.

Í frétt um málið á CNN Money er haft eftir Hans Olsen greinanda hjá Barclays Capital að fjárfestar séu að glíma við svör við tveimur spurningum. Annarsvegar er það hvort Bandaríkin séu á leið í aðra kreppu og hinsvegar sé það spurningin um hvort evran muni lifa af þær hremmingar sem ganga yfir evrusvæðið vegna skuldakreppunnar í suðurhluta Evrópu.