Strumparnir sagðir á bakvið hlutabréfahrunið

Þeir eru litlir, bláir og sætir og sem stendur eru þeir mjög óvelkomnir, eða persona non grata, á Wall Street. Margir telja, að vísu meir í gamni en alvöru, að Strumparnir séu ástæðan fyrir hlutabréfahruninu á Wall Street uppúr síðustu mánaðarmótum.

Viðskiptafréttasíður greina frá þessu máli. Það voru Strumparnir, þ.e. þrír leikarar í gervi þeirra, sem hringdu opnunarbjöllunni í kauphöllinni á Wall Street föstudaginn 29. júlí s.l. Þetta var liður í að kynna nýjustu Strumpamyndina.

Markaðurinn þennan dag endar í mínus. Sömu sögu er að segja næstu daga eftir þessa helgi og fimmtudagur 4. ágúst  endar með 5% falli Dow Jones vísitölunnar, því versta síðan í fjármálakreppunni 2008. Daginn eftir missa Bandaríkin topplánshæfiseinkunn sína. Þá hefst mikil rússíbanareið á mörkuðum um allan heiminn.

Í frétt vefsíðunnar e24.no er vitnað í bandarískan álitsgjafa sem útskýrir þátt Strumpanna á þann hátt að þeir séu jú kommúnistar. Þjóðfélag þeirra byggist á samvinnu í efnahagsmálum. Þar að auki séu þeir með einræðisherra sem leiðtoga. Álitsgjafinn er þar að tala um Gamlastrump.

Á vefsíðunni segir að þessi kenning sé að sjálfsögðu grín en þar sem enginn hefur getað spáð fyrir um sveiflurnar á mörkuðum undanfarið hefur hún orðið vinsæl meðal fjárfesta.