Hallgrímur og Steinþór Freyr kallaðir inn í landsliðið

Hallgrímur Jónasson, leikmaður GAIS í Svíþjóð, og Steinþór Freyr Þorsteinsson, leikmaður Sandnes Ulf í Noregi, hafa verið kallaðir inn í íslenska landsliðið í knattspyrnu. Ólafur Jóhannesson landsliðsþjálfari staðfesti þetta í samtali við Vísi.

Ólafur valdi í síðustu viku 23 manna hóp fyrir leikina gegn Noregi og Kýpur í undankeppni Evrópumótsins 2012. Tíðindin benda til þess að einhverjir leikmenn Íslands gangi ekki heilir til skógar. Meðal leikmanna sem hafa glímt við meiðsli undanfarið er Gylfi Þór Sigurðsson leikmaður Hoffenheim.

Hallgrímur, sem er um þessar mundir í láni hjá SönderjyskE í Danmörku, er varnarmaður sem bendir til þess að einhver af miðvörðum Íslands eigi ekki heimangengt í leikina. Hermann Hreiðarsson spilaði ekki með Portsmouth í Championship-deildinni um helgina.

Ísland mætir Noregi á Ullevaal-vellinum í Osló á föstudagskvöld og Kýpur á Laugardalsvelli á þriðjudaginn eftir viku.