Vick meiddist illa á hendi um helgina

Það á ekki af Michael Vick, leikstjórnanda Philadelphia Eagles, að ganga. Fyrir viku síðan fékk hann heilahristing og um helgina meiddist hann illa á hendi í tapi gegn NY Giants.

Í upphafi var talið að hann væri handleggsbrotinn en nú hefur komið í ljós að hann er illa marinn. Meiðslin eru ekki á kasthöndinni.

"Ég reyndi að verja mig. Þrátt fyrir allt var ekki dæmt víti á þetta. Svona er þetta búið að vera síðustu þrjár vikur og það hlaut að koma að því að eitthvað slæmt gerðist," sagði Vick sem er allt annað en sáttur við þá vernd sem hann fær frá dómurunum.

Hann spilar líklega ekki um næstu helgi með Eagles.