Bayern stokkið í slaginn um Götze

Einn eftirsóttasti leikmaðurinn í þýska boltanum er Mario Götze, leikmaður Dortmund. Fjölmörg félög vilja kaupa strákinn og þar á meðal er Bayern Munchen.

Karl-Heinz Rummenigge, stjórnarformaður Bayern, segir að það sé ekki eingöngu undir Dortmund komið hvar leikmaðurinn spili í framtíðinni.

Forráðamenn Dortmund segja það ekki koma til greina að selja leikmanninn til annars liðs í Þýskalandi.

"Þetta eru ótrúleg ummæli. Það koma þrír aðilar að málum er leikmaður skiptir um félag. Það á eftir að koma í ljós hvort Götze sé sammála þeim," sagði Rummenigge.

Hinn 19 ára Götze er samningsbundinn Dortmund til ársins 2014.