Schumacher sexfaldur sigurvegari á Suzuka brautinni

Michael Schumacher hjá Mercedes liðinu er sá Formúlu 1 ökumaður sem hefur oftast fagnað sigri á Suzuka-brautinni í Japan, en keppt verður á brautinni um næstu helgi. Mótið er það fyrsta í Asíu á árinu, en keppt verður í Suður Kóreu um aðra helgi. Brautin í Suzuka er í uppáhaldi hjá mörgum ökumönnum, og Nico Rosberg liðsfélagi Schumacher, telur hana eina af þeim bestu sem notuð er á keppnistímabilinu, rétt eins og Schumacher.

Á síðustu tíu árum hefur sá ökumaður sem hefur verið fremstur á ráslínu fagnað sigri í mótinu á Suzuka í 75% tilfella, samkvæmt fréttatilkynningu frá Mercedes.

„Suzuka er mjög sérstök braut og ég á góðar minningar frá frábærum mótum gegnum tíðina. Ég nýt þess að keppa á brautinni og að stilla bílnum upp á réttan hátt, til að ná því besta út úr honum á braut sem reynir á," sagði Schumacher.

Suzuka-brautinni er sú eina sem liggur nærri því að vera í laginu eins og átta, en keyrt er yfir og undir brú á mótssvæðinu.

„Fyrsti hluti brautarinnar er frábær. Háhraða beygjur og blönduð útgáfa af beygjum þýða að Suzuka er ein besta brautin á tímabilinu og ein af þeim sem er í uppáhaldi hjá mér. Við munum vinna af kappi um helgina og vonandi getum við sýnt styrk og náð í stig," sagði Schumacher.

Rosberg telur erfitt að fara framúr á brautinni, en með notkun stillanlegs afturvængs í ár gæti orðið breyting á möguleikum ökumanna. Með því að breyta afstöðu afturvængs, þá getur ökumaður aukið hámarkshraða bílsins á tilteknu svæði í kappakstrinum og notkun afturvængsins er frjáls á æfingum og í tímatökunni.

„Ég nýt þess ætíð að heimsækja Japan vegna japanska kappakstursins og Suzuka er frábær braut. Ég tel hana eina af bestu brautunum á Formúlu 1 mótaskránni og þetta er braut sem allir ökumenn hafa yndi af að keyra", sagði Rosberg.

Hann telur legu brautarinnar reyna mikið á ökumenn, bæði háhraða beygjurnar og krappari beygjurnar.

„Það hefur verið erfitt að fara framúr gegnum tíðina og það verður því áhugavert að sjá hvernig nýju reglurnar virka. Ég hef yndi af stemmningunni í Japan og áhorfendur eru virkilega áhugasamir í stuðningi sínum", sagði Rosberg og sagðist vonast eftir að mótið yrði gott fyrir heimamenn og að liðið næði hagstæðum úrslitum.