Ekkert að því að leita til Kínverja

Fráfarandi bankastjóri Seðlabanka Evrópu, Jean-Claude Trichet, segir það vera eðlilegt að leita til Kínverja um hjálp þegar kemur að fjármögnun björgunarsjóðs Evrópusambandsins. Þetta kemur fram í viðtali við Trichet á vefsíðu BBC í tilefni af því að hann er að hætta störfum í dag.

Klaus Regling, framkvæmdastjóri björgunarsjóðsins, er nú staddur í Asíu að kynna sjóðinn fyrir stórþjóðum álfunnar með það fyrir augum að þær geti tekið þátt í því að kaupa skuldabréf sjóðsins þegar kemur að útgáfu þeirra.

Kínverjar hafa enn ekki samþykkt að taka þátt í fjármögnun sjóðsins samkvæmt fréttum Wall Street Journal. Þeir hafa vitnað til þess að nákvæmari útlistun á hlutverki sjóðsins þurfi að liggja fyrir áður en þeir taka ákvörðun um þátttöku í fjármögnuninni.

Samkvæmt fréttum breska ríkisútvarpsins BBC standa vonir til þess að Kínverjar kaupi skuldabréf að sjóðnum fyrir um einn milljarð evra, sem nemur um tíu prósent af heildarstærð sjóðsins.