Sarkozy segir lausn um helgina vera einu leiðina

Nicolas Sarkozy, forseti Frakklands, segir ekkert annað koma til greina fyrir leiðtoga evruríkjanna en að komast að afgerandi niðurstöðum um helgina, hvað varðar viðbrögð við vaxandi skuldavanda þjóðríkja og banka í Evrópu. Sarkozy segir enn fremur að nauðsynlegt sé að grípa strax til aðgerða og kynna þær vel fyrir opnun markað á mánudag. Þetta kom fram á blaðamannafundi sem Sarkozy hélt í Brussell í dag en þar eru leiðtogar evruríkjanna samankomnir til þess að freista þess að ná samkomulagi um breytingar á sáttmála Evrópusambandsins, með það fyrir augum að leysa úr skuldavandanum í Evrópu.

Einkum eru horft til þriggja meginatriða í þessum viðræðum, samkvæmt frásögn breska ríkisútvarpsins BBC. Í fyrsta lagi er það breyting á umgjörð ríkisfjármála þannig að mögulegt sé að refsa þjóðum sem ekki halda sig innan þeirra viðmiða sem gilda eiga um ríkisfjármál hverrar þjóðar. Í öðru lagi er það síðan frekari skorður við skuldsetningu og í þriðja lagi er það sameiginlegur fjármagnstekjuskattur, sem ætlað er að stuðla að stöðugleika á fjármálamörkuðum.