Einn þingmaður tók Warren Buffett á orðinu

Ofurfjárfesturinn Warren Buffett skoraði nýlega á þingmenn Repúblikanaflokksins að gefa hluta af launum sínum í ríkissjóð til að styrkja afleita stöðu sjóðsins. Buffett myndi leggja fram sömu upphæð sjálfur. Einn þeirra tók Buffett strax á orðinu.

Fjallað er um málið á CNNMoney. Þar segir að sá sem brást strax við áskorun Buffett var Scott Rigell fulltrúadeildarþingmaður frá Virginíu. Hann hefur ákveðið að láta 15% af launum sínum á síðasta ári og þessu ári renna beint í ríkissjóð. Nemur upphæðin um 23.000 dollara hvort árið.

Um leið og þetta lá ljóst fyrir skrifaði Buffett þessum þingmanni bréf þar sem segir að hann muni greiða sömu upphæðir á móti í sjóðinn. Jafnframt lýsir Buffett yfir mikilli ánægju með að Rigell skuli hafa tekið hann á orðinu.

Í þessu sambandi er rifjuð upp saga af Howard, föður Buffett, en hann sat þrjú kjörtímabil sem þingmaður Repúblikana í fulltrúadeildinni á fimmta áratug síðustu aldar. Hann varð þekktur þegar þingmenn samþykktu að hækka árslaun sín um 2.500 dollara. Howard neitaði að taka við þessari hækkun og sagði það ósæmandi að þingmenn væru að hækka eigin laun.

Það fylgir sögunni að Rigell er eini þingmaðurinn sem tekið hefur áskorun Buffetts.