Smíðuðu dýrasta armbandsúr í heimi

Svissneska úrafyrirtækið Hublot hefur smíðað dýrasta armbandsúr í heiminum. Úrið er metið á 5 milljónir dollara, eða yfir 600 milljónir króna, en það er smíðað úr hvítagulli og skreytt með tæplega 1.300 litlum demöntum.

Það tók 17 manns hjá Hublot um 14 mánuði að smíða úrið. Í frétt um málið á BBC segir að úrið verði sýnt völdum hópi fólks á einkasýningu í Basel á næstunni.

Þrátt fyrir kreppuna í Evrópu hefur svissneskum úrasmiðum vegnað vel undanfarin ár vegna mikillar eftirspurnar frá Asíu.