Walker kominn með nægilegt fé til að kaupa Iceland

Reiknað er með að Malcolm Walker forstjóri verslunarkeðjunnar Iceland Foods nái að safna saman nægilegu fé til að kaupa keðjuna í þessari viku.

Þetta kemur fram í frétt í blaðinu Daily Mail. Þar segir að hugsanlega verði þá strax gengið frá tæplega 1,5 milljarða punda kaupum Walkers á Iceland. Það er Lord Kirkham stofnandi húsgagnakeðjunnar DFS sem m.a. leggur fé í kaupin en Kirkham er vinur Walkers um árabil en þeir koma báðir frá Yorkshire. Reiknað er með að Kirkham fái sæti í nýrri stjórn Iceland.

Auk Kirkham hefur Walker fengið lán frá verslunarkeðjunni Landmark, Deutsche Bank og tveimur fjárfestingarsjóðum.