Hallgrímur með sigurmark SönderjyskE

Hallgrímur Jónasson var hetja SönderjyskE sem lagði Nordsjælland 1-0 á heimavelli í efstu deild dönsku knattpyrnunnar í dag.

Hallgrímur skoraði eina mark leiksins á 38. mínútu með skalla eftir hornspyrnu. Eyjólfur Héðinsson var einnig í byrjunarliðinu og var áminntur í fyrri hálfleik.

Sigurinn var nokkuð óvæntur enda Nordsjælland í toppbaráttu deildarinnar og grætur sárlega þau þrjú stig sem töpuðust í dag. Liðið hefði með sigri komist upp að hlið FCK í toppsæti deildarinnar en liðið mætir Bröndby síðar í dag.

SönderjyskE er í 9. sæti en aðeins munar fimm stigum á liðunum í 5. - 9. sæti deildarinnar.