Guðjón skoraði í þriðja leiknum í röð - kominn með sjö mörk

Guðjón Baldvinsson skoraði annað marka Halmstad í 3-1 heimasigri á Varbergs BoIS FC í sænsku b-deildinni í dag og er þar með búinn að skora sjö mörk í fyrstu tíu leikjum sínum á tímabilinu.

Varbergs BoIS FC komst í 1-0 eftir aðeins níu mínútna leik en Guðjón jafnaði tveimur mínútum síðar. Mikael Boman kom Halmstad yfir á 20. mínútu og Antonio Rojas innsiglaði síðan sigurinn á 77. mínútu.

Þrír Íslendingar leika með Halmstad og þeir voru allir í byrjunarliðinu. Guðjón Baldvinsson var frammi en þeir Kristinn Steindórsson og Jónas Guðni Sævarsson spiluðu á miðjunni. Jónas Guðni kláraði leikinn, Kristinn fór á út á 82. mínútu og Guðjóni var skipt útaf á 87. mínútu.

Guðjón var að skora í þriðja leiknum í röð en hann skoraði einnig í 4-0 sigri á Umea FC og 2-0 sigri á Bromma'karna. Halmstad hefur unnið alla þessa þrjá leiki og er nú komið upp í annað sæti deildarinnar með 20 stig í 10 leikjum.