New York Times reynir að ná til Kínverja

New York Times birti í gær, í fyrsta skipti, fréttavef sinn á kínversku og hyggst framvegis bjóða upp á að skoða fréttir á því tungumáli. Ætlun ritstjórnar fjölmiðilsins er að ná til þess fólks í Asíu og Kína sem hefur tök á því að skoða alþjóðlegar fréttir, og er þar ekki síst horft til ört vaxandi millistéttar, að því er segir í frétt breska ríkisútvarpsins BBC um þessa breytingu hjá New York Times.

Joseph Kahn, ritstjóri erlendra frétta hjá New York Times, segir þessi stefnubreyting eigi að koma til mesta vaxtarhóp notenda internetsins á heimsvísu, sem er í Kína. Þar eru nú 500 milljónir manna sem nota internetið reglulega í tölvum og símum, en heildaríbúafjöldi landsins er 1,4 milljarðar manna.

Búist er við því að fjöldi internetnotenda í landinu muni vaxa mikið á næstu árum. Þrátt fyrir aukna internetnotkun reyna stjórnvöld í Kína hvað þau geta til þess að ritskoða nær alla fjölmiðlun og beita boðum og bönnum, til þess að koma í veg fyrir að almenningur geti náð sér í upplýsingar óhindrað. Það verður hins vegar sífellt erfiðara að halda þessari ritskoðun við, sökum tækniframfara, ekki síst í farsímum.

Sjá má frétt breska ríkisútvarpsins BBC um þessa breytingu New York Times hér.