Monti óttast „árásir“ fjárfesta á Evrópuríki

Mario Monti, forsætisráðherra Ítalíu, óttast að aðilar á markaði, eins og vogunarsjóðir og fleiri fjárfestar, muni stunda það að gera „árásir" á hagkerfi einstakra þjóða í Evrópu ef þjóðarleiðtogar í álfunni koma sér ekki saman um trúverðugar og almennar aðgerðir til þess að sporna gegn djúpri kreppu í Evrópu.

Ítalir hafa verið að glíma við djúpa kreppu líkt og nágrannaríki landsins í Suður-Evrópu, Grikkland, Portúgal og Spánn. Það sem háir löndunum ekki síst er hár lántökukostnaður, sem hefur gert löndunum nær ómögulegt að endurfjármagna opinberar skuldir. Sem dæmi um það eru vextir á spænskum ríkisskuldabréfum nú með yfir sex prósenta áhættuálagi sem er verulega íþyngjandi fyrir ríkissjóð Spánar, en vaxtakjör sem eru með viðlíka álagi eru álitin ósjálfbær eða of íþyngjandi svo fjármögnunin borgi sig.

Monti segir að nauðsynlegt sé fyrir leiðtoga Evrópu að bregðast við með samræmdum aðgerðum tafarlaust. Líklega sé ekki meira en vika til stefnu. Annars geti efnhagskreppan í Evrópu dýpkað enn frekar.

Sjá má umfjöllun breska ríkisútvarpsins BBC um þessi mál hér.