Einn af upphafsmönnum evrusamstarfsins óttast um framtíð þess

Otmar Issing, fyrrverandi aðalhagfræðingur Seðlabanka Evrópu, varar við því að evrusvæðið geti liðast í sundur í bók sem kallast "Hvernig við björgum evrunni og styrkjum Evrópu" og kemur út í þessari viku.

Öll rök standa til þess að bjarga evrusvæðinu. Það liggur þó enn ekki fyrir hve mörg ríki geta verið með í framtíðinni, segir Issing í bókinni, sem er skrifuð sem samtal á milli hagfræðings og blaðamanns.

Samkvæmt frásögn Daily Telegraph nefnir Issing Grikkland aldrei á nafn, en ríkið hefur rambað á barmi gjaldþrots í allnokkurn tíma. Ríkið hefur þurft að skera verulega niður útgjöld og hækka skatta til að fá lánafyrirgreiðslu frá Evrópusambandinu og Seðlabanka Evrópu.

Issing er einn af þeim sem hönnuðu evrusamstarfið, en hann spáði því jafnframt að vandamál gætu komið upp. Nú segir hann að sum ríki verði að yfirgefa myntsamstarfið til að ná tökum á eigin skuldamálum en Þýskaland ætti að vera áfram í evrusamstarfinu.