Sölvi tryggði FCK dramatískan sigur í uppbótartíma

Sölvi Geir Ottesen var hetja danska liðsins FCK í dag er hann skoraði sigurmark liðsins gegn Randers í uppbótartíma.

FCK lenti 2-1 undir og þegar komið var fram á 90. mínútu var ekkert sem benti til annars en að Randers myndi hafa sigur.

Leikmenn FCK neituðu að gefast upp. Andreas Cornelius jafnaði á 90. mínútu og Sölvi Geir tryggði liðinu sigur skömmu síðar. Ótrúleg endurkoma.

Þetta var fyrsti leikur Sölva í liðinu í nokkurn tíma en hann hefur verið meiddur. Ragnar Sigurðsson fór á bekkinn þar sem Sölvi var tekinn inn í liðið.

FCK er sem fyrr á toppi deildarinnar.